幾天前, 和老婆在超市購物時, 突然發覺場內充斥著大批幼稚園的學生.
原來, 這些小朋友, 正學習如何在超市購物.
只見他/她們各拿著一張十蚊紙, 既忐忑又興奮地在超市瀏覽, 希望買到自己的心頭好.
由於金錢有限, 因此小朋友手中不是拿著一包薯片, 便是一排朱古力.
就是如此的一班矮小特別的顧客, 在CASHIER處排隊俾錢, 令超級市場增添了一筆亮色.
前果排, 便曾突發懷舊之情, 車埋阿媽, 返去睇下以前就讀嘅幼稚園.
我幼時住在九龍城寨, 間幼稚園就正喺對面馬路.
城寨無左, 變身公園;
幼園依舊, 春風化雨.
你地果間,又執左未?
招牌, 依然無變, 仲寫住'安琪幼稚園'.
小時候, 覺得間野好大,
而家睇番, 原來好細, D檯凳仲好似小人國咁, 好CUTE.
媽媽說:
'你初初番幼稚園時, 好怕羞, 連去廁所都唔敢舉手,
所以, 成日瀨尿!'
'幼稚園入面, 有一個婆婆好好人, 每次你瀨濕褲, 都會幫你洗番條褲仔!'
我心諗, 幼稚園成班塞豆窿, 經常都有瀨尿既可能, 呢個婆婆每日咪要洗幾百條褲仔?
咁, 佢對手咪好大陣尿味?
頂, 佢有無摸過我個頭?
對呢個婆婆, 我完全無印象!
反而有一單野, 我印象深刻!
有一次番學, 茶點時間時, 老師派餅乾仔.
我地一個個排隊出去拎, 情況好似監獄嘅囚犯......
果D餅乾, 係兩面餅夾住D CREAM果D.
我拎完, 又奀皮, 忍唔住, 將兩面餅掰開玩 (相信好多人都試過咁做).
呢邊奶下, 果邊奶下, 好變態!
我有兩塊餅乾, 掰開左, 有4塊, 覺得好威!
於是我放D餅在檯面上, 造成視覺上好壯觀既感覺, 獨自陶醉欣賞!
老師黎鬧我, 我惟有匆匆食晒佢.
過左一陣, 哎呀! 肚痛!
肯定係D餅乾亂擺, 檯面又多細菌, 出事囉!
好辛苦......
我又唔敢舉手同老師講, 惟有死忍爛忍!
然後, 便上演驚心動魄的一幕----肛門肌肉力戰滾滾黃流!!
最後,
河堤崩潰, 黃流湧出,
後者全勝!
頓時, 全班瀰漫一片惡臭!
老師問: '邊個同學瀨左屎?'
我果時仲細, 以為瀨屎好大罪, 唔敢認!
屁股更加緊貼凳面, 企圖盡量掩蓋惡臭散播!
老師再問, 房中依舊一片沉默, 無人答腔.
老師發脾氣, 說:
'你唔認呀嘛! 好! 我而家黎逐個CHECK!'
我心諗: ' X街啦!' (我肯定當時的我唔識呢個TERM, 但用呢個TERM好完全形容到我當時既心情, 故借用之!)
老師逐個係學生後面CHECK, 先抆低我地褲頭, 再睇我地PATPAT有無屎跡可尋! 有時仲'哄'到好埋TIM!
當老師行到我背後既時候, 我個心跳到甩出黎咁滯!
MISS抆低我褲頭, 開始'哄'埋黎啦......
好驚呀!!!
真係夾都無咁夾, 呢個時候, 我竟然------
放左一個屁!
隨即我聽到背後MISS的悽厲的慘叫聲!
OH, SHIT~
IT'S REALLY 'SHIT'!!
Search